رکن اسمبلی ابوعاصم اعظمی کا ہندو مسلم اتحاد پر زور, مسجدوں و مدارس کے سامنے ڈی جے نہ بجانے کی اپیل
ممبئی ممبئی اننت چترتھی گنپتی وسرجن اور عید میلاد النبی ایک ہی روز آنے کے سبب مسلمانوں نے براداران وطن کیلئے اسے دوسرے روز منانے کا فیصلہ کیا ہے لیکن میری اپنے ہندو بھائیوں سے اپیل ہے کہ وہ گنپتی وسرجن کے دوران مسجد و مدرسوں کے پاس سے شور شرابہ اور ڈی جے بجانے سے گریز کریں کیونکہ مسجدوں میں نمازیں ہوتی ہیں- ایسے میں نمازوں میں خلل پیدا ہوتا ہے اور یہی وجہ تصادم اور بھائی چارگی کو مکدر کر نے کا باعث بنتی ہے اور شرپسند عناصر قومی یکجہتی کو پارہ پارہ کر نے کیلئے ہندوؤں اور مسلمانوں میں نفرت پیدا کرنے کی کوششیں کر تے ہیں- یہ کبھی اپنے اس عمل میں کامیاب نہیں ہوسکتے کیونکہ وطن عزیز کے ہندو اور مسلمان مل جل کر رہتے ہیں اور یہی ہمارا خاصہ بھی ہے اس لئے ہمیں ان نفرت پسندوں کو منہ توڑ جواب دینا ہوگا- اس قسم کی درخواست اپنے ویڈیو پیغام میں مہاراشٹر سماجوادی پارٹی لیڈر و رکن اسمبلی ابوعاصم اعظمی نے کی ہے۔
ابوعاصم اعظمی نے کہا کہ ملک کے حالات میں نفرت پیدا کرنے والوں کو ہمیں محبت کا پیغام دینا ہوگا کیونکہ یہی ہماری گنگا جمنی تہذیب ہے اور اسے برقرار رہنا ہماری ذمہ داری ہے- انہوں نے کہا کہ مسلمان ہر کسی مذہب کا احترام کر تے ہیں اس لئے ہندو بھائیوں کو بھی ان کے مذہب کا احترام کرنا چاہئے اور مسجدوں کے باہر شور شرابہ اور ڈی جے بجانے سے اجتناب کرنا چاہئے اس سے بھائی چارگی کو فروغ ملے گا میری دونوں سے گزارش ہے کہ وہ ایک دوسرے کے مذہبی جذبات اور احساسات کا خیال رکھیں تاکہ یہ ملک امن و امان کا گہوارہ رہے اور یہاں امن و سلامتی کی حکمرانی برقرار رہے کیونکہ فرقہ پرست عناصر اس ملک میں نفرت پھیلانے کی کوشش کر تے ہیں اسے ہمیں سبوتاژ کر نا ہوگا۔ اعظمی نے ہندو مسلم اتحاد پر زور دیتے ہوئے یہ واضح کیا ہے کہ ریاست اور ممبئی میں مسلمان ایک دوسرے کے مذہب کا احترام کر تے ہیں اس لئے اس عمل کو برقرار رکھنا چاہئے اگر کوئی فرقہ پرست عناصر گڑ بڑی کرتا ہے تو اس کو سبق سکھانا ضروری ہے-
22
