آسٹریلیا کی جارحانہ بلے بازی ، ہندوستان کو جیت کے لئے 353 رن درکار

راجکوٹ، آسٹریلیا نےچار ٹاپ آرڈر بلے بازوں کی شاندارنصف سنچریوں کی بدولت بدھ کو تیسرے اور آخری ایک روزہ میچ میں ہندوستان کے خلاف سات وکٹ پر 352 رنز بنائے۔
سلامی بلے باز مچل مارش (96) اور ڈیوڈ وارنر (56) نے ٹیم کو طوفانی آغاز دیا اور پہلی وکٹ کے لیے 78 رنز جوڑے، حالانکہ مارش اپنے کیرئیر کی دوسری سنچری بنانے سے محروم رہے۔ کلدیپ یادو نے انہیں اپنا شکار بنایا جبکہ وارنر کی اننگز کو پرسدھ کرشنا نے وکٹ کے پیچھے کیچ کراکر ختم کیا۔ وارنر نے صرف 34 گیندوں کی اپنی اننگز میں چھ چوکے اور چار چھکے لگائے جبکہ دوسرے سرے پر مارش نے 13 چوکے اور تین چھکے لگائے۔
مہمان ٹیم صرف 28 اوورز میں 215 رنز جوڑ کر 400 کا ہندسہ پار کرنے کے ارادے سے میدان میں اتری تھی لیکن محمد سراج نے اسٹیو اسمتھ (74) کو ایل بی ڈبلیو کرکے آسٹریلیا کے رن کی رفتار کو روکا جس کے بعد جسپریت بمراہ نے ایلکس کیری (11) ، گلین میکسویل (5) اور مارنس لیبوشگن (72) کی وکٹیں حاصل کرکے مہمان ٹیم کے بلے بازوں کو قابو میں کیا۔ کلدیپ نے کیمرون گرین (9) کو اپنا شکار بنایا۔
اس میچ کے لیے جسے ورلڈ کپ کی تیاری کے طور پر دیکھا جا رہا ہے، دونوں ٹیمیں کچھ تبدیلیوں کے ساتھ میدان میں اتریں۔ ہندوستانی ٹیم پہلے دو میچ جیت کر سیریز پہلے ہی اپنے نام کر چکی ہے۔ تیزگیندباز محمد شامی کی جگہ محمد سراج کو اور اسپنر روی چندرن اشون کی جگہ واشنگٹن سندرم کو ٹیم انڈیا شامل کیا گیا جب کہ کپتان روہت شرما اور وراٹ کوہلی کی بھی ٹیم میں واپسی ہوئی ہے۔