نئی دہلی، عام آدمی پارٹی نے جمعرات کو وزیر اعلی اروند کیجریوال کی گرفتاری کے خلاف 'جیل کا جواب ووٹ سے' دستخطی مہم شروع کی۔
مشرقی دہلی لوک سبھا سیٹ سے انڈیا گروپ کے امیدوار کلدیپ کمار اور جنگ پورہ سے آپ کے ایم ایل اے پراوین کمار نے یہاں لاجپت نگر سنٹرل مارکیٹ سے مہم کا آغاز کیا۔ اس دوران کلدیپ کمار نے کہا کہ اروند کیجریوال نے دہلی کے لوگوں کے لیے بہت سارے کام کیے ہیں جن میں مفت اور 24 گھنٹے بجلی، پانی، اچھے اسکول اور اسپتال شامل ہیں۔ بی جے پی کی طرف سے ایسے وزیر اعلیٰ کو جیل میں ڈالنے سے دہلی کے لوگوں میں شدید غصہ ہے۔ دہلی کے عوام اپنے بیٹے اروند کیجریوال کے ساتھ کھڑے ہیں اور اس بار وہ اپنے ووٹوں سے جیل کا جواب دیں گے اور دہلی سے بی جے پی کا صفایا کریں گے۔

جناب کلدیپ کمار نے کہا کہ دہلی کے لوگ 25 مئی کو دہلی سے بی جے پی کو جڑ سے اکھاڑ پھینکنے کا کام کریں گے۔ دہلی کے لوگ اروند کیجریوال کی گرفتاری کے خلاف طرح طرح کی مہم چلا رہے ہیں۔ جب عوام اروند کیجریوال کی حمایت میں سڑکوں پر نکلتی ہے تو ان کے خلاف ایف آئی آر درج کرکے گرفتاری عمل میں لائی جاتی ہے، اسی لیے آج عوام کو 25 مئی کا بے صبری سے انتظار ہے۔