نئی دہلی، عام آدمی پارٹی کے سینئر لیڈر اور کابینی وزیر سوربھ بھردواج نے پیر کو کہا کہ انفورسمنٹ ڈائریکٹوریٹ (ای ڈی) کی کارروائی پورے ملک کے لیے پریشان کن ہے کہ مرکزی حکومت کی غنڈہ گردی کس قدر کھلے عام چل رہی ہے۔ مسٹر بھردواج نے یہاں نامہ نگاروں کو بتایا کہ اوکھلا اسمبلی سے پارٹی کے ایم ایل اے امانت اللہ خان کو ای ڈی نے گرفتار کر لیا ہے۔ انہوں نے کہا کہ یہ پورے ملک کے لیے لمحہ فکریہ ہے کہ مرکزی حکومت کی غنڈہ گردی کس قدر کھلے عام جاری ہے۔ انہوں نے کہا کہ وقف بورڈ میں پیسے لے کر بھرتی کا جھوٹا اور بے بنیاد معاملہ جان بوجھ کر بنایا گیا اور پارٹی کے ایم ایل اے امانت اللہ خان کو اس میں ملوث کیا گیا۔
انہوں نے کہا کہ مرکزی حکومت نے امانت اللہ خان کو زبردستی جھوٹے مقدمے میں پھنسانے کی کوشش کی۔ پہلے اے سی بی اور پھر سی بی آئی نے امانت اللہ خان کے گھر پر چھاپہ مارا، پھر انہیں گرفتار بھی کر لیا گیا، لیکن کوئی ٹھوس ثبوت پیش نہ کر سکے اور عدالت سے ضمانت مل گئی۔ اب جب اے سی بی اور سی بی آئی اس معاملے میں کچھ نہیں کر سکے، اس بار بھارتیہ جنتا پارٹی (بی جے پی) کی قیادت والی مرکزی حکومت نے مسٹر خان کو پھنسانے کے لیے ای ڈی کی مدد لی ہے۔ کبھی اخبارات میں اور کبھی نیوز چینلز کے ذریعے ان کی بدنامی ہوئی۔ اے اے پی لیڈر نے کہا کہ عام آدمی پارٹی کے تمام ایم ایل اے اور وزراء کو پی ایم ایل اے ایکٹ کے تحت گرفتار کیا جاتا ہے، کیونکہ اس ایکٹ میں ایسی سخت دفعات ہیں کہ گرفتار شخص گرفتاری کے بعد کم از کم 4-6 ماہ تک جیل میں ہی رہے گا۔ انتخابات سے چند ماہ قبل ہی پارٹی ایم ایل اے کو اس طرح گرفتار کیا جا رہا ہے تاکہ وہ الیکشن کے وقت اسمبلی سے غائب رہیں اور الیکشن ہار جائیں۔ انہوں نے کہا کہ مرکزی حکومت نے جانچ ایجنسی کا مذاق اڑایا ہے۔ خواہش کے مطابق کارروائی کی جا رہی ہے۔ ایک ہی کیس کے ملزم مختلف لوگوں کے ساتھ مختلف سلوک کیا جا رہا ہے۔ اس ملک کے عوام نے اب فیصلہ کر لیا ہے کہ بی جے پی کو اقتدار چھوڑنا ہے۔
