نئی دہلی، وزیر اعظم نریندر مودی نے آج امید ظاہر کی ہے کہ ان کے برونائی دارالسلام اور سنگاپور کے دورے سے ہندوستان اور آسیان کے درمیان شراکت داری مزید مضبوط ہوگی۔
جناب مودی منگل کی صبح آسیان کے ان اہم شراکت دار ممالک کے تین روزہ دورے پر روانہ ہوئے۔ مسٹر مودی مقامی وقت کے مطابق شام 5 بجے برونائی پہنچیں گے۔ ہندوستانی کمیونٹی کے لوگوں کے لئے ایک استقبالیہ پروگرام میں شرکت کے علاوہ وہ ہندوستانی ہائی کمیشن میں نئی چانسری بلڈنگ کا بھی افتتاح کریں گے۔ وہ رات کو عمر علی سیف الدین مسجد بھی جائیں گے۔
اپنی روانگی سے قبل ایک بیان میں مسٹر مودی نے کہا، "آج، میں برونائی دارالسلام کا اپنا پہلا دو طرفہ دورہ کر رہا ہوں۔ جب ہم اپنے سفارتی تعلقات کے 40 سال کا جشن مناتے ہیں، میں اپنے تاریخی تعلقات کو نئی بلندیوں تک لے جانے کے لیے عزت مآب سلطان حاجی حسنال بولکیہ اور شاہی خاندان کے دیگر معزز اراکین کے ساتھ اپنی ملاقاتوں کا منتظر ہوں۔‘‘
دورے کے دوسرے مرحلے کے حوالے سے وزیر اعظم نے کہا کہ برونائی سے میں 4 ستمبر کو سنگاپور جاؤں گا۔ میں صدر تھرمن شانموگرٹنم، وزیر اعظم لارنس وونگ، سینئر وزیر لی ہسین لونگ اور ایمریٹس سینئر وزیر گوہ چوک ٹونگ سے ملاقات کے موقع کا منتظر ہوں۔ میں سنگاپور کی متحرک کاروباری برادری کے رہنماؤں سے بھی ملوں گا۔" انہوں نے کہا، "میں اپنی اسٹریٹجک شراکت داری کو مزید گہرا کرنے کے لیے، خاص طور پر جدید مینوفیکچرنگ، ڈیجیٹلائزیشن اور پائیدار ترقی کے نئے اور ابھرتے ہوئے شعبوں میں اپنی بات چیت کا منتظر ہوں۔ دونوں ممالک ہماری ایکٹ ایسٹ پالیسی اور انڈو پیسفک ویژن میں اہم شراکت دار ہیں۔ مجھے یقین ہے کہ میرے دوروں سے برونائی، سنگاپور اور عظیم تر آسیان خطے کے ساتھ ہماری شراکت داری کو مزید تقویت ملے گی۔
