جالندھر، پنجاب میں، جالندھر کمشنریٹ پولیس نے جگو بھگوان پورییا گینگ کے تین ارکان کو گرفتار کر کے ان کے پاس سے بھاری مقدار میں اسلحہ برآمد کیا ہے۔ پولیس کمشنر سوپن شرما نے جمعرات کو کہا کہ بھگوان پورییا گینگ سے وابستہ ایک خوفناک گینگسٹر انکاؤنٹر کے دوران زخمی ہو گیا۔ وہ بھاری مقدار میں اسلحہ لے کر پولیس کی گرفت سے فرار ہونے کی کوشش کر رہا تھا۔ پولیس کمشنر نے جانکاری دیتے ہوئے کہا کہ وویک مٹو عرف بادل، ساکن پٹی بیری جنڈیالہ، جالندھر پر دو بدمعاشوں نے حملہ کیا، جن کی شناخت منجیت سنگھ اور امندیپ سنگھ کے طور پر ہوئی ہے۔ انہوں نے بتایا کہ بدنام زمانہ جگو بھگوان پورییا گینگ سے تعلق رکھنے والے دونوں غنڈوں نے وویک پر گولی چلائی جس کے بعد وہ زخمی ہوگیا۔ پولیس کمشنر نے کہا کہ دونوں ملزمین کو پولیس نے گرفتار کر لیا ہے اور اس کے بعد ایک اور ملزم دیویندرپال سنگھ کو بھی گرفتار کر لیا گیا ہے۔ انہوں نے کہا کہ منجیت سنگھ اور امندیپ سنگھ کی طرف سے دی گئی معلومات کی بنیاد پر ایک 9 ایم ایم پستول اور تین 9 ایم ایم کارتوس برآمد کیے گئے ہیں۔ مسٹر شرما نے کہا کہ یہ مجرم قتل، دھمکیاں، بھتہ خوری اور دیگر کئی مجرمانہ سرگرمیوں میں ملوث تھے۔ انہوں نے بتایا کہ ان کے خلاف پہلے ہی کئی ایف آئی آر زیر التوا ہیں۔
