نئی دہلی: کانگریس پارٹی نے جمعہ کو دعویٰ کیا کہ اس کے پاس اس بات کے ثبوت ہیں کہ راشٹریہ سویم سیوک سنگھ (آر ایس ایس) اور بھارتیہ جنتا پارٹی (بی جے پی) ملک میں جمہوریت کو غیر مستحکم کرنے اور آئینی اداروں کو تباہ کرنے کے لیے بیرونی ایجنسیوں سے خفیہ مدد لے رہے ہیں۔ پارٹی نے کہا کہ مودی حکومت اس وقت ہندوستان میں انتخابات پر اثر انداز ہونے کے لیے امریکی سرکاری ایجنسی یو ایس ایڈ کے فنڈز فراہم کرنے کے معاملے پر جو پروپیگنڈہ کر رہی ہے وہ دراصل اصل مسائل سے توجہ ہٹانے کی کوشش ہے، کیونکہ خود حکمراں جماعت سے جڑے لوگ ریاستی ایجنسیوں سے مدد لیتے رہے ہیں۔
