چنئی: مدراس ہائی کورٹ نے مرکزی حکومت کو ہدایت کی ہے کہ وہ مشہور تامل میگزین 'آنندا وکاتن' کی ویب سائٹ کو بحال کرے، جسے وزیر اعظم نریندر مودی کے حالیہ دورہ امریکہ کے دوران ایک متنازعہ کارٹون شائع کرنے کے بعد بلاک کر دیا گیا تھا۔ وزارت اطلاعات و نشریات کو بلاک شدہ ویب سائٹ کو بحال کرنے کی ہدایت دیتے ہوئے عدالت نے حکم دیا کہ میگزین کو عارضی طور پر اس کارٹون کو ہٹا دینا چاہیے، جس پر بی جے پی نے مسٹر مودی کو توہین آمیز انداز میں پیش کرنے اور ان کی توہین کرنے پر سخت اعتراض کیا ہے۔ جمعے کو موصول ہونے والی اطلاعات کے مطابق عدالتی حکم کے بعد میگزین کی ویب سائٹ بحال کر دی گئی ہے اور متنازع کارٹون کو ہٹا دیا گیا ہے۔ ایک صدی سے زیادہ عرصے سے شائع ہونے والے اس میگزین نے ایک طنزیہ کارٹون شائع کیا تھا جس میں مسٹر مودی کو امریکی صدر ڈونلڈ ٹرمپ کے ساتھ حالیہ دورہ امریکہ کے دوران زنجیروں میں جکڑا ہوا دکھایا گیا تھا۔
