نئی دہلی، دہلی حکومت نے سردیوں کے موسم میں فضائی آلودگی میں اضافے کے خدشے کے پیش نظر تمام قسم کے پٹاخوں کی تیاری، ذخیرہ کرنے، فروخت اور استعمال پر مکمل پابندی لگانے کا فیصلہ کیا ہے۔ پٹاخوں پر مکمل پابندی کے بارے میں وزیر ماحولیات گوپال رائے نے آج کہا کہ سردیوں کے موسم میں دہلی میں فضائی آلودگی بڑھنے کا خطرہ ہے۔ اس موسم میں بھی پٹاخے جلانے سے آلودگی میں اضافہ ہوتا ہے، ایسی صورتحال کے پیش نظر گزشتہ سال کی طرح اس بار بھی پٹاخوں کی تیاری، ذخیرہ اندوزی، فروخت اور استعمال پر مکمل پابندی عائد کی جا رہی ہے۔ پٹاخوں کی آن لائن ترسیل یا فروخت پر مکمل پابندی ہوگی۔ پٹاخوں کے حوالے سے لوگوں میں کسی قسم کا شک نہیں ہونا چاہیے، اس لیے یہ پابندی ہر قسم کے پٹاخوں کے لیے درست ہے۔ یہ پابندی دہلی میں یکم جنوری 2025 تک نافذ رہے گی۔
