لکھنؤ، سماج وادی پارٹی (ایس پی) کے صدر اکھلیش یادو نے جمعرات کو کہا کہ یوگی حکومت کے کہنے پر پولیس انتظامیہ بے قصور لوگوں کو جھوٹے مقدمات میں پھنساتی ہے جبکہ مجرموں کو بچانے کا کام کیا جا رہا ہے۔ یہاں جاری ایک بیان میں مسٹر یادو نے کہا کہ بی جے پی حکومت میں ناانصافی اور مظالم اپنے عروج پر ہیں۔ ہاتھرس میں دلت بیٹی کی جبری تدفین کا معاملہ ہو یا بی ایچ یو میں اجتماعی عصمت دری کا معاملہ، اس حکومت میں انصاف فراہم نہیں کیا گیا۔ حکومت نے ملزمان کو تحفظ دیا جبکہ متاثرہ کے حق میں انصاف کے لیے آواز اٹھانے والوں کے خلاف کارروائی کی جا رہی ہے۔
