نئی دہلی: دہلی کے وزیر ماحولیات گوپال رائے نے اتوار کو کہا کہ حکومت کے مختلف اقدامات اور عوام کے تعاون کی وجہ سے اس بار دسہرہ کے اگلے دن دہلی کی ہوا صاف رہی۔ شری رائے نے کہا کہ سردیوں کا موسم پورے شمالی ہندوستان اور خاص طور پر دہلی میں آلودگی لاتا ہے، لیکن آج دسہرہ کے اگلے دن ہم دہلی کی صاف ہوا میں سانس لے رہے ہیں۔ عام طور پر دہلی میں ہوا کا معیار دسہرہ کے اگلے دن خراب حالت میں پہنچ جاتا ہے۔ دہلی میں گزشتہ 10 دنوں سے بارش نہیں ہوئی ہے۔ اس کے باوجود ایئر کوالٹی انڈیکس خراب حالت سے باہر ہے۔ دہلی کے اندر یہ مسلسل دوسرا سال ہے۔ گزشتہ سال بھی جنوری سے 12 اکتوبر تک 200 دن ایسے تھے جنہیں اچھے دنوں میں شمار کیا گیا تھا۔ انہوں نے کہا کہ 2016 کے بعد صرف 2020 میں لاک ڈاؤن کے دوران دہلی نے 200 اچھے دنوں کا ہندسہ عبور کیا تھا۔ دہلی میں بغیر لاک ڈاؤن کے لگاتار دوسرے سال 365 میں سے 200 اچھے دن کا حصول دہلی کے لوگوں کے لیے ایک بڑی کامیابی ہے۔ سال 2016 میں ان کی تعداد صرف 109 تھی۔ یہ اعداد و شمار مرکز میں بھارتیہ جنتا پارٹی (بی جے پی) حکومت کے تحت کام کرنے والے مرکزی آلودگی کنٹرول بورڈ نے جاری کیے ہیں۔ بی جے پی لیڈر ہر بار جھوٹ بولتے ہیں کہ دہلی میں آلودگی بڑھ رہی ہے۔
