ممبئی: ٹام لیتھم کی کپتانی میں نیوزی لینڈ کی ٹیم نے اتوار کو تیسرے ٹیسٹ میچ میں بھارت کو 25 رنز سے شکست دے کر تین ٹیسٹ میچوں کی سیریز میں تاریخی کلین سویپ کیا۔ اعزاز پٹیل کو عمدہ باؤلنگ پر پلیئر آف دی میچ کا ایوارڈ دیا گیا۔ جبکہ ول ینگ کو پلیئر آف دی سیریز کا ایوارڈ ملا۔ 92 سال کی ٹیسٹ تاریخ میں پہلی بار نیوزی لینڈ نے ہندوستانی ٹیم کو اپنی ہی سرزمین پر کلین سویپ کیا ہے۔ نیوزی لینڈ کی ٹیم نے پہلی بار 1955 میں ہندوستان کا دورہ کیا، پانچ میچوں کی ٹیسٹ سیریز میں 2-0 سے شکست کھائی۔ سیریز کے تین میچ ڈرا ہوئے۔ پھر 1965 میں نیوزی لینڈ کی ٹیم ہندوستان آئی اور اس بار بھی اسے ایک بھی ٹیسٹ جیتنے کا موقع نہیں ملا۔ بھارت نے نیوزی لینڈ کو چار ٹیسٹ میچوں کی سیریز میں 1-0 سے شکست دی تھی۔ اور تین میچ ڈرا ہوئے۔ اس کے بعد نیوزی لینڈ نے 1969 میں ہندوستان کا دورہ کیا اور اس وقت ہندوستانی سرزمین پر پہلا ٹیسٹ جیتا تھا۔ نیوزی لینڈ تین میچوں کی اس سیریز کو 1-1 سے برابر کرنے میں کامیاب رہا۔
