نئی دہلی: سینٹرل ڈرگ اسٹینڈرڈ کنٹرول آرگنائزیشن (سی ڈی ایس سی او) نے کہا ہے کہ ملک میں پرانے طبی آلات کی درآمد کی اجازت نہیں ہے۔ سی ڈی ایس سی او نے کسٹمز کے پرنسپل کمشنر کو لکھی گئی وضاحت میں کہا کہ کسٹمز کو ملک میں پرانے اور دوبارہ کنڈیشنڈ طبی آلات کی درآمد کی اجازت نہیں دینی چاہیے۔ یہ وضاحت 11 جنوری کو کسٹمز آفس کو لکھے گئے خط میں دی گئی۔ متعلقہ سرکلر کی ایک کاپی جمعہ کو یہاں جاری کی گئی۔ وضاحت میں کہا گیا ہے کہ طبی آلات کا معیار، حفاظت اور کارکردگی ڈرگس اینڈ کاسمیٹکس ایکٹ 1941 اور میڈیکل ڈیوائسز رولز 2017 کے تحت چلتی ہے۔ ان دونوں میں پرانے یا ری کنڈیشنڈ طبی آلات سے متعلق کوئی شق نہیں ہے۔ ایسے آلات کی درآمد کے لیے رجسٹریشن سرٹیفکیٹ جاری نہیں کیا جاتا۔ اس لیے پرانے اور ری کنڈیشنڈ طبی آلات کی درآمد کی اجازت نہ دی جائے۔ انڈیا فاؤنڈیشن کے پیشنٹ سیفٹی اینڈ ایکسیس انیشیٹو نے سیکنڈ ہینڈ طبی آلات کی درآمد پر وضاحت کا خیر مقدم کیا ہے اور کہا ہے کہ اس سے ملک میں لوگوں کو معیاری علاج کی فراہمی یقینی ہو گی۔
