ممبئی: پنجابی فلموں کے سپر اسٹار گلوکار و اداکار دلجیت دوسانجھ کی بہت انتظار کی جانے والی فلم 'پنجاب 95' کی ریلیز کی تاریخ ملتوی کر دی گئی ہے۔ دلجیت دوسانجھ کی فلم 'پنجاب 95' کا بے صبری سے انتظار کرنے والے مداحوں کو مزید انتظار کرنا پڑے گا کیونکہ فلم کی ریلیز ملتوی کر دی گئی ہے۔ جسونت سنگھ کھالڑا کی زندگی پر مبنی فلم پنجاب 95، پہلے 7 فروری کو سینما گھروں میں ریلیز ہونے والی تھی۔ دلجیت نے اپنے انسٹاگرام اسٹوریز پر جسونت سنگھ کھالرا کی تصویر کے ساتھ ایک نوٹ بھی شیئر کیا۔ انہوں نے نوٹ میں لکھا، ہمیں بہت افسوس ہے، آپ کو یہ بتاتے ہوئے دکھ ہو رہا ہے کہ فلم پنجاب 95 ہمارے قابو سے باہر حالات کی وجہ سے 7 فروری کو ریلیز نہیں ہوگی۔ فلم پنجاب 95 کو ہنی ٹریہان نے ڈائریکٹ کیا ہے اور اسے رونی اسکریو والا نے پروڈیوس کیا ہے۔ یہ فلم جسونت سنگھ کھالڑا کی کہانی بیان کرتی ہے، جسونت سنگھ کھالڑا ایک سماجی کارکن اور انسانی حقوق کے کارکن تھے، جو کہ امرتسر میں ایک بینک کے ڈائریکٹر تھے، حقوق کے لیے لڑتے تھے۔
