نئی دہلی: راجدھانی کے نئی دہلی ریلوے اسٹیشن پر کل رات ہونے والے حادثے کی وجہ فٹ اوور برج کی پلیٹ فارم نمبر 14 اور 15 کی طرف جانے والی سیڑھیوں سے ایک مسافر پھسل گیا اور اس کے پیچھے کئی مسافر اس کی زد میں آ گئے۔
شمالی ریلوے کے چیف ترجمان نے آج صبح یہاں یہ جانکاری دی اور یہ بھی کہا کہ ریلوے کی طرف سے کل رات کے بھگدڑ کے واقعہ سے متاثرہ لوگوں میں معاوضہ کی رقم تقسیم کی جا رہی ہے۔
ترجمان کے مطابق جاں بحق ہونے والوں کے لواحقین کو 10 لاکھ روپے، شدید زخمیوں کو ڈھائی لاکھ روپے اور معمولی زخمیوں کو ایک ایک لاکھ روپے کا معاوضہ دیا جا رہا ہے۔ حادثے کی وجہ پوچھے جانے پر ترجمان نے کہا کہ جس وقت یہ افسوسناک واقعہ پیش آیا اس وقت پٹنہ جانے والی مگدھ ایکسپریس نئی دہلی ریلوے اسٹیشن کے پلیٹ فارم نمبر 14 پر کھڑی تھی اور جموں جانے والی اتر سمپرک کرانتی ایکسپریس پلیٹ فارم نمبر 15 پر کھڑی تھی۔ اس دوران ایک مسافر فٹ اوور برج سے پھسل کر پلیٹ فارم نمبر 14 اور 15 کی طرف جانے والی سیڑھیوں پر گرا اور اس کی زد میں آکر یہ افسوسناک واقعہ پیش آیا۔ اس حادثے کی تحقیقات ایک اعلیٰ سطحی کمیٹی کر رہی ہے۔
تاہم ریلوے ترجمان نے ہلاکتوں کی تعداد کے بارے میں کوئی اطلاع نہیں دی۔ اس بارے میں جب اصرار سے پوچھا گیا تو انہوں نے کہا کہ اس پورے واقعہ کے بارے میں سرکاری اور تفصیلی معلومات شیئر کی جائیں گی۔
رات کو میڈیا رپورٹس میں کہا گیا تھا کہ حادثے میں لوگ ہلاک ہوئے تھے اور ان کی تعداد مختلف بتائی گئی تھی۔ لیکن کوئی سرکاری اعداد و شمار نہیں دیے گئے۔ غیر مصدقہ اطلاعات کے مطابق ہلاکتوں کی تعداد 18 تک پہنچ گئی ہے۔
