لکھیم پور کھیری، اتر پردیش کے وزیر اعلیٰ یوگی آدتیہ ناتھ نے ہفتہ کو یہاں کمبھی شوگر مل کمپلیکس میں بلرام پور شوگر ملز لمیٹڈ کے ذریعہ 2,850 کروڑ روپے کی لاگت سے لگائے گئے ملک کے پہلے بائیو پولیمر پلانٹ کا سنگ بنیاد رکھا۔ یوگی نے کہا کہ حکومت نے ملک کے پہلے بائیو پلاسٹک پلانٹ کے لیے جس ایم او یو پر دستخط کیے تھے، آج اسے لاگو کر دیا گیا ہے۔ یہ ملک میں اپنی نوعیت کی پہلی سرمایہ کاری ہے۔ یہاں بنی بوتلیں، پلیٹیں، کپ اور کیری بیگ مکمل طور پر ڈسپوزایبل ہوں گے اور صرف تین ماہ میں خود بخود مٹی میں گھل جائیں گے۔
انہوں نے کہا کہ آج پوری دنیا اتر پردیش کے مہا کمبھ میں شرکت کے لیے پرجوش ہے۔ انہوں نے کہا کہ اب تک 13 جنوری سے 22 فروری تک 60 کروڑ عقیدت مندوں نے سنگم میں مقدس غسل کیا ہے۔ انہوں نے کہا کہ یہاں سے میں گولا گوکرناتھ اور پھر پریاگ راج جاؤں گا، لیکن میں نے کمبھی میں ہی مہا کمبھ دیکھا۔ یہ سرمایہ کاری کا عظیم کمبھ ہے۔
