دہرادون: تلاش اور بچاؤ ٹیموں نے اتوار کو تین مزدوروں کی لاشیں نکال لیں جو جمعہ کو اتراکھنڈ میں ہندوستان-چین سرحد پر منا گاؤں کے قریب برفانی تودہ گرنے کے بعد لاپتہ ہو گئے تھے۔ اس سے قبل ہفتے کی رات چار مزدوروں کی لاشیں برآمد ہوئی تھیں۔ اس طرح اب تک کل سات مزدوروں کی لاشیں نکالی جا چکی ہیں۔ اس کے ساتھ ہی دہرادون کا رہنے والا ایک شخص ابھی تک لاپتہ ہے۔ ڈیزاسٹر منیجمنٹ اور بحالی کے سکریٹری ونود کمار سمن نے آج سہ پہر بتایا کہ لاپتہ کارکن کی تلاش جاری ہے۔ تلاش اور ریسکیو ٹیمیں اسے بچانے کے لیے جنگی بنیادوں پر کام کر رہی ہیں۔ انہوں نے بتایا کہ جیوتیرمٹھ میں مردہ کارکنوں کا پوسٹ مارٹم کرنے کا عمل جاری ہے۔ انتظامیہ کی جانب سے جاں بحق افراد کی میتیں ان کے گھروں تک پہنچانے کے انتظامات کیے جا رہے ہیں۔ انہوں نے کہا کہ 44 کارکنوں کو بحفاظت بچا لیا گیا ہے جنہیں جیوتیرمٹھ کے آرمی اسپتال میں داخل کرایا گیا ہے جہاں سبھی کی حالت نارمل ہے۔ ان کے علاج کے لیے مناسب انتظامات کیے گئے ہیں اور ان کی ضروریات کا پورا خیال رکھا جا رہا ہے۔ مسٹر سمن نے کہا کہ دو شدید زخمی کارکنوں کا ایمس، رشیکیش میں علاج کیا جا رہا ہے۔ ایمس، رشیکیش انتظامیہ سے موصولہ اطلاع کے مطابق ان کی حالت میں بہتری آرہی ہے۔
