نئی دہلی، وزیر دفاع راج ناتھ سنگھ کل سے روس کے تین روزہ سرکاری دورے پر ہوں گے۔ وزارت دفاع نے ہفتہ کو یہاں کہا کہ اس دورے کے دوران وزیر دفاع اور روسی وزیر دفاع آندرے بیلوسوف منگل کو ماسکو میں فوجی اور فوجی تکنیکی تعاون سے متعلق ہندوستان-روس بین الحکومتی کمیشن کی 21ویں میٹنگ کی مشترکہ صدارت کریں گے۔ دونوں رہنما دفاعی شعبے میں دونوں ممالک کے درمیان کثیر جہتی تعلقات کی پوری رینج کا جائزہ لیں گے جس میں ملٹری ٹو ملٹری اور صنعتی تعاون شامل ہے۔ وہ باہمی دلچسپی کے عصری علاقائی اور عالمی امور پر بھی تبادلہ خیال کریں گے۔ وزیر دفاع ہندوستانی بحریہ کے جدید ترین ملٹی رول اسٹیلتھ گائیڈڈ میزائل فریگیٹ 'آئی این ایس توشیل' کو پیر کو ینترا شپ یارڈ، کیلینن گراڈ میں بحریہ کے بیڑے میں شامل کریں گے۔ بحریہ کے سربراہ ایڈمرل دنیش کے ترپاٹھی بھی اس موقع پر مسٹر سنگھ کے ساتھ ہوں گے۔ مزید برآں، وزیر دفاع دوسری جنگ عظیم کے دوران مارے گئے سوویت فوجیوں کے اعزاز میں ماسکو میں 'نامعلوم فوجی کے مقبرے' پر خراج عقیدت پیش کریں گے۔ وہ ہندوستانی برادری کے ارکان سے بھی بات چیت کریں گے۔
