نئی دہلی: دہلی کی ایک خصوصی عدالت نے منگل کو کانگریس کے سابق رکن پارلیمنٹ سجن کمار کو 1984 کے سکھ مخالف فسادات کے دوران سرسوتی وہار علاقے میں دو افراد کے قتل سے متعلق ایک معاملے میں عمر قید کی سزا سنائی۔ ایم پی/ایم ایل اے کیسز کے لیے خصوصی جج کاویری باویجا نے استغاثہ اور دفاعی وکیل کے دلائل سننے کے بعد یہ حکم سنایا۔ 12 فروری کو عدالت نے سجن کمار کو تعزیرات ہند کی مختلف دفعات کے تحت قابل سزا جرائم کے لیے مجرم قرار دیا تھا۔ سزا کی مقدار پر دلائل سننے کے بعد عدالت نے فیصلہ سنانے کے لیے معاملہ 25 فروری کے لیے مقرر کیا تھا۔
