نئی دہلی: امریکی صدر ڈونلڈ ٹرمپ کی جانب سے محصولات کے نفاذ پر گہری تشویش کا اظہار کرتے ہوئے کانگریس نے کہا ہے کہ یورپی یونین، برطانیہ، مغربی ایشیا، چین، جاپان، لاطینی امریکی ممالک اور افریقی یونین کے ساتھ آزاد تجارتی معاہدے (ایف ٹی اے) پر نظر ثانی کی جائے اور اس معاملے پر امریکہ کے ساتھ بات چیت جاری رہے اور اس کے لیے ایک ٹاسک فورس بنائی جائے، جس میں تمام شعبوں کے ماہرین شامل ہوں۔ کانگریس کے سینئر لیڈر آنند شرما نے ہفتہ کو یہاں پارٹی ہیڈکوارٹر میں ایک پریس کانفرنس میں کہا کہ دو دن پہلے امریکہ نے باہمی ٹیرف کا اعلان کیا، جس سے پوری دنیا کی تجارت کو نقصان پہنچا ہے اور اس فیصلے نے سات دہائیوں پرانے بین الاقوامی نظام کو ایک ہی جھٹکے میں تباہ کر دیا ہے۔ کئی دہائیوں تک دنیا سرمایہ کاری پر راضی تھی اور ٹیرف اور تجارت پر اتفاق رائے کے بعد ورلڈ ٹریڈ آرگنائزیشن کا قیام عمل میں آیا۔ اس انتظام کے بعد پہلی بار کسی بڑے ملک نے ریسیپروکل ٹیرف کی اصطلاح استعمال کی ہے جو کہ انتہائی افسوس ناک ہے۔
