کولکتہ: مغربی بنگال کے گورنر سی وی آنند جمعہ کو فسادات سے متاثرہ مرشد آباد کے لیے روانہ ہوئے، انہوں نے وزیر اعلیٰ ممتا بنرجی کی وہاں کا دورہ ملتوی کرنے کی اپیل کو مسترد کر دیا۔
راج بھون کے ذرائع کے مطابق گورنر آج مالدہ کے سرکٹ ہاؤس میں رات قیام کریں گے اور وہاں سے ہفتہ کو مرشد آباد، سمشیر گنج اور دھولیان کے متاثرہ علاقوں کا دورہ کریں گے۔
انہوں نے کہا کہ مرشد آباد کی بے گھر اور مصیبت زدہ خواتین کے ایک وفد نے جمعرات کی دوپہر گورنر سے ملاقات کی اور ان کی حالت زار کی وضاحت کی۔ گورنر نے انہیں یقین دلایا ہے کہ حالات کو معمول پر لانے کے لیے مناسب اقدامات کیے جا رہے ہیں۔
قبل ازیں، محترمہ بنرجی نے کل ایک پریس کانفرنس میں مسٹر بوس سے فساد زدہ مرشد آباد کا دورہ ملتوی کرنے پر زور دیتے ہوئے کہا تھا کہ ضلع میں حالات بتدریج معمول پر آرہے ہیں اور انتظامیہ لوگوں کے اعتماد کو بحال کرنے کے لیے سرگرمی سے کام کر رہی ہے۔
انہوں نے کہا، "میں درخواست کروں گی کہ مقامی لوگوں کے علاوہ اب کوئی بھی مرشد آباد نہ جائے، امن آہستہ آہستہ لوٹ رہا ہے اور اس صورتحال میں ہمیں انتظامیہ کی مدد کرنی چاہیے تاکہ وہ اعتماد سازی کا کام جاری رکھ سکیں۔ میں عزت مآب گورنر سے کچھ دن انتظار کرنے کی اپیل کروں گی۔ ہمارا ویمن کمیشن بھی جانا چاہتا تھا، لیکن میں نے انہیں روک دیا، میں بھی نہیں جا رہی۔" انہوں نے کہا کہ حالات معمول پر آنے کے بعد ہی وہ مرشد آباد جائیں گی۔
